చెన్నై సూపర్ కింగ్స్ చేతిలో సన్ రైజర్స్ హైదరాబాద్ ఓటమి

ఐపీఎల్ 2024లో భాగంగా.. చెన్నై సూపర్ కింగ్స్ తో జరిగిన మ్యాచ్ లో సన్ రైజర్స్ హైదరాబాద్ ఓటమిపాలైంది. 78 పరుగుల తేడాతో చెన్నై విజయం సాధించింది. హైదరాబాద్ బ్యాటర్లను చెన్నై బౌలర్లు కట్టడి చేయడంతో చెన్నై ఈ విజయాన్ని నమోదు చేసింది.

213 పరుగుల లక్ష్యంతో బరిలోకి దిగిన హైదరాబాద్ .. 18.5 ఓవర్లలో 134 పరుగులకే ఆలౌటైంది. హైదరాబాద్ బ్యాటర్లు పూర్తిగా విఫలమయ్యారు, ఈ మ్యాచ్ లో ఓటమితో హైదరాబాద్ వరుసగా రెండు మ్యాచ్ ల్లో ఓడిపోయింది. చెన్నై బౌలర్లలో తుషార్ దేశ్ పాండే కీలకమైన 4 వికెట్లు తీసి.. జట్టు విజయానికి కీలక పాత్ర పోషించాడు. ఆ తర్వాత ముస్తాఫిజుర్, పతిరన తలో రెండు వికెట్లు పడగొట్టారు. జడేజా, శార్ధూల్ ఠాకూర్ కు తలో వికెట్ దక్కింది.

అంతకుముందు బ్యాటింగ్ చేసిన చెన్నై సూపర్ కింగ్స్ భారీ స్కోరు చేసింది. చెన్నై నిర్ణీత 20 ఓవర్లలో 3 వికెట్లు కోల్పోయి 212 పరుగులు చేసింది. కెప్టెన్ రుతురాజ్ గైక్వాడ్ 98 పరుగులతో అద్భుత ఇన్నింగ్స్ ఆడాడు. గైక్వాడ్ ఇన్నింగ్స్ లో 3 సిక్సులు, 10 ఫోర్లు ఉన్నాయి. అతనికి తోడు శివం దూబే 39 పరుగులతో సహకారం అందించాడు.హైదరాబాద్ బౌలర్లలో భువనేశ్వర్ కుమార్, నటరాజన్, ఉనద్కత్ తలో వికెట్ తీశారు., ప్లేయర్ ఆఫ్ ది మ్యాచ్ గా రుతురాజ్ గైక్వాడ్ ఎంపికయ్యాడు