40 ఏళ్ళుగా చంద్రబాబు చేయని పనులు సీఎం జగన్ చేసి చూపారు – ఎమ్మెల్సీ భరత్

ఇచ్చిన మాట నిలబెట్టుకుంటు కుప్పం నియోజకవర్గానికి కృష్ణా జలాలను సీఎం జగన్ తీసుకురావడంలో సఫలీకృతం అయ్యారు. హంద్రీ-నీవా సుజల స్రవంతిలో భాగంగా 560 కోట్ల వ్యయంతో కుప్పం బ్రాంచ్ కెనాల్ పూర్తి చేసి ప్రారంభించారు. ఈ సందర్భంగా శాంతిపురం మండలం గుండుశెట్టిపల్లె వద్ద జరిగిన బహిరంగ సభలో మాట్లాడిన ఎమ్మెల్సీ కెఆర్‌జె భరత్ సీఎం జగన్ పనితీరును ప్రశంసించారు. ఆయన ఏమన్నారంటే..

ఈ రోజు కుప్పం చరిత్రలోనే సువర్ణాక్షరాలతో లిఖించదగిన రోజు, దశాబ్ధాల కల నెరవేర్చిన సీఎం జగన్ గారికి కుప్పం ప్రజల తరుపున ధన్యవాదాలు. 23-09-2022న కుప్పం బహిరంగ సభలో కుప్పంకు కృష్ణా జలాలు ఇస్తే కానీ నేను ఓటు అడగను అన్న గుండె జగనన్నది. అన్న మనకు ఇచ్చిన మాట నిలబెట్టుకున్నారు. కుప్పం ప్రజలకు ఆప్యాయత కరువైంది, అలాంటి మాకు మీ ప్రేమానురాగాలు రుచిచూపించారు. గత 40 ఏళ్ళుగా పెత్తందారీ చంద్రబాబు చేయలేని పనులు మనసున్న మారాజుగా మీరు చేసి చూపారు. మీరు కుప్పాన్ని మునిసిపాలిటీగా మార్చడమే కాక దానికి రూ. 66 కోట్ల నిధులు మంజూరు చేసి అభివృద్ది పథంలో నడుపుతున్నారు. అంతేకాదు రెవెన్యూ డివిజన్‌ చేయడం, సబ్‌ డివిజన్‌ చేయడం, ఇలా ఎన్నెన్నో చేసి కుప్పం ప్రజల కళ్ళలో వెలుగులు నింపారు.

ఈ మధ్య చంద్రబాబు తరచూ కుప్పం వస్తున్నారంటే మీ వల్ల వచ్చిన భయమే. మీరు చేసిన అభివృద్ది, సంక్షేమం చూసిన ప్రజలు మీ గురించే మాట్లాడుతున్నారు. ఈ ప్రాంతం నుంచి రోజూ 10 వేల మంది రోజు కూలీ కోసం ట్రైన్స్‌లో బెంగళూరు, చెన్నై వెళుతుంటారు. ఈసారి 2024లో మీరు సీఎం అయిన తర్వాత మా కుప్పానికి ఒక ఎస్‌ఈజెడ్, ఇంజినీరింగ్‌ కాలేజ్, బెంగళూరుకు నేషనల్‌ హైవే తీసుకువచ్చి ఇక్కడ ప్రజల జీవితాల్లో వెలుగులు నింపాలని కోరుతున్నాను.

అలాగే ఇక్కడ రెండు రిజర్వాయర్లు కట్టిస్తామని చెప్పారు, అవి కూడా పూర్తిచేయాలని కోరుకుంటున్నాను. స్ధానికంగా ఉన్న సమస్యలను మీరు పరిష్కరిస్తారని కోరుతున్నాను. మరో 50 రోజుల్లో జరగబోయే ఎన్నికల్లో దుష్టచతుష్టయాన్ని, ప్యాకేజ్‌ స్టార్‌లను ఓడించడానికి నేను సిద్దం… కుప్పాన్ని, పులివెందులను రెండూ రెండు కళ్లుగా చూసుకుంటున్న సీఎంగారికి ధన్యవాదాలు అంటూ ఎమ్మెల్సీ కెఆర్‌జె భరత్ తన ప్రసంగాన్ని ముగించారు..