సంక్షేమ లోగిళ్లు

అన్న వస్తున్నాడు.. మంచి రోజులు వస్తున్నాయని చెప్పండి.. ఇది వైఎస్‌ జగన్‌మోహన్‌రెడ్డి 2019 ఎన్నికల ప్రచారంలో చెప్పిన మాట. నేను విన్నాను.. నేను ఉన్నాను.. అంటూ ఆయన అన్నివర్గాలకు ఆనాడు భరోసా కల్పించారు. అధికారంలోకి వచ్చిన నాటి నుంచి సంక్షేమం, అభివృద్ధే లక్ష్యంగా పనిచేస్తున్నారు. తన పాలనలో ఆయన వివిధ పథకాల రూపంలో ప్రజలకు అందించిన మొత్తం రూ.4.15 లక్షల కోట్లు. ఇందులో రూపాయి అవినీతి లేదు. ఈ డబ్బును నేరుగా లబ్ధిదారుల బ్యాంక్‌ ఖాతాల్లో జమచేశారు.

ఒక్కో పథకంలో ఇలా..

• ప్రభుత్వ బడుల్లో అమలవుతున్న జగనన్న గోరుముద్ద కోసం వైఎస్సార్‌సీపీ ప్రభుత్వం రూ.4,417 కోట్లు ఖర్చు చేసింది. 43,26,782 మంది లబ్ధి పొందారు. గతంలో ఉన్న మెనూను మార్చేశారు. రుచికరమైన పౌష్టికాహారాన్ని పిల్లలకు అందిస్తున్నారు. గతంలో మధ్యాహ్నం సమయంలో విద్యార్థులకు అన్నం తినేందుకు ఇళ్లకు వెళ్లేవారు. ఆ అవకాశం లేని కొందరు పస్తులుండేవారు. ఇప్పుడు ఆ పరిస్థితి లేదు.
• వైఎస్సార్‌ పెన్షన్‌ కానుక కింద వృద్ధులు, దివ్యాంగులు, వితంతువులు, కిడ్నీ వ్యాధిగ్రస్తులు తదితర వర్గాలకు రూ.84,730.97 కోట్లను ప్రభుత్వం వెచ్చించింది. గతంలో పెన్షన్‌ అందుకోవాలంటే ఎన్నో ఇబ్బందులుండేవి. రోజుల తరబడి తిరగాల్సి వచ్చేది. నేడు ఆ పరిస్థితి లేదు. వలంటీర్లు ప్రతి నెలా ఒకటో తేదీనే లబ్ధిదారుల ఇళ్లకు వెళ్లి డబ్బు చేతిలో పెట్టి క్షేమ సమాచారం తెలుసుకుంటున్నారు.
• జగనన్న వసతి దీవెన.. దీని లబ్ధిదారుల సంఖ్య 27,17,245. వీరి కోసం ఖర్చు చేసిన మొత్తం రూ.4,275 కోట్లు. ఉన్నత చదువులు అభ్యసించే విద్యార్థుల కోసం ప్రవేశపెట్టిన పథకం ఇది. వారి హాస్టల్‌ ఫీజు తదితర అవసరాలకు జగనన్నే నగదు ఇస్తున్నారు.
• జగనన్న విద్యాదీవెన.. పేద పిల్లలు పెద్ద చదువులు చదివి జీవితంలో స్థిరపడాలని, వారి కలలను సాకారం చేసుకునేందుకు ప్రారంభించిన పథకం ఇది. గత టీడీపీ సర్కార్‌ ఫీజు రీయింబర్స్‌మెంట్‌ విషయంలో మోసం చేయగా అనేకమంది విద్యార్థులకు విద్యకు దూరమయ్యారు. నెల్లూరు జిల్లాలో ఓ ఇంజినీరింగ్‌ విద్యార్థి తన ఫీజు తల్లిదండ్రులకు భారం కాకూడదని ఆత్మహత్య చేసుకున్నాడు. ఆ సమయంలో పరామర్శించి చలించిపోయిన జగన్‌ అధికారంలోకి వచ్చాక విద్యా దీవెనను పక్కాగా అమలు చేస్తున్నారు. దీని లబ్ధిదారుల సంఖ్య 26,28,728. ప్రభుత్వం వెచ్చించిన మొత్తం రూ.11,901 కోట్లు.
• డాక్టర్‌ వైఎస్సార్‌ ఆరోగ్యశ్రీ. ఇది రాజశేఖరరెడ్డి ప్రవేశపెట్టిన అద్భుత పథకం. ఆ తర్వాత వచ్చిన ప్రభుత్వాలు పట్టించుకోకపోవడంతో పేదలు తీవ్ర ఇబ్బందులు పడ్డారు. జగన్‌ సీఎం అయ్యాక ఈ పథకం రూపురేఖలు మారిపోయాయి. నెట్‌వర్క్‌ ఆస్పత్రుల సంఖ్య పెరిగింది. వ్యాధుల సంఖ్యను పెంచి అనేకమందికి సేవలందిస్తున్నారు. కొంతకాలం క్రితం రూ.5 లక్షలున్న పరిమితిని రూ.25 లక్షలకు పెంచారు. రూ.1,000 దాటితే ఆరోగ్యశ్రీ వర్తించేలా చర్యలు తీసుకోవడంతో పేదలు కార్పొరేట్‌ హాస్పిటళ్లలో ఉచితంగా వైద్యం చేయించుకుంటున్నారు. ఇప్పటి వరకు లబ్ధిపొందిన వారు 27,39,976 మంది. ఖర్చు చేసిన మొత్తం రూ.8,845.53 కోట్లు.
• జగనన్న తోడు.. చిరు వ్యాపారులకు అండగా నిలిచేందుకు మొదలుపెట్టిన పథకం ఇది. దీని కింద ప్రభుత్వం వడ్డీలేని రుణం ఇస్తుంది. గతంలో అధిక వడ్డీల బారిన పడిన చిరు వ్యాపారులు నేడు రుణాలు తీసుకుంటూ.. తిరిగి చెల్లిస్తూ ఆనందంగా ఉన్నారు. ఈ పథకం లబ్ధిదారుల సంఖ్య 15,87,492. ఖర్చు చేసిన నగదు రూ.2,955.79 కోట్లు.
• జగనన్న ఇళ్ల పట్టాలు.. టీడీపీ అధికారంలో ఉన్నప్పుడు పేదలకు ఇళ్ల పట్టాలు ఇచ్చేందుకు చంద్రబాబు చొరవ చూపలేదు. చాలామంది బాడుగ గృహాల్లో ఉంటూ ఇబ్బందులు పడుతున్నారు. ఈ విషయాన్ని గమనించిన జగన్‌ 30,76,018 మంది మహిళలకు పట్టాలు ఉచితంగా ఇచ్చి ఇళ్లు కట్టిస్తున్నారు. ఇందుకోసం ప్రభుత్వం ఇప్పటివరకు రూ.75,670.05 కోట్లు వెచ్చించింది.
• వైఎస్సార్‌ రైతు భరోసా.. అన్నదాతలకు సాగు విషయంలో సాయం చేసేందుకు శ్రీకారం చుట్టిన పథకం. ఇందులో భాగంగా రైతుల బ్యాంక్‌ ఖాతాల్లో ప్రభుత్వం నగదు జమ చేస్తోంది. దీని లబ్ధిదారులు 53,52,905 మంది. ఖర్చు పెట్టిన మొత్తం రూ.33,299.80 కోట్లు. ఇంకా రైతాంగం కోసం ప్రభుత్వం పెద్ద మొత్తంలో నగదు వెచ్చించింది. అందులో వైఎస్సార్‌ సున్నా వడ్డీ పంట రుణాలు ఒకటి. దీని లబ్ధిదారులు 73,87,602 మంది. అందించిన నగదు రూ.1,834.55 కోట్లు. మరో పథకం వైఎస్సార్‌ ఉచిత పంటల బీమా.. దీని కింద లబ్ధి పొందింది 54,75,651 మంది. ఖర్చు పెట్టిన మొత్తం రూ.7,802.05 కోట్లు. మరో పథకం ఇన్‌పుట్‌ సబ్సిడీ.. దీని లబ్ధిదారుల సంఖ్య 22,84,841 మంది. ఖర్చు చేసిన నగదు రూ.1,976 కోట్లు.
• జగనన్న అమ్మఒడి.. పేద పిల్లల స్థితిగతులు మార్చేందుకు శ్రీకారం చుట్టిన పథకం ఇది. లబ్ధిదారులు 44,48,865 మంది. ప్రభుత్వం చేసిన వ్యయం రూ.26,067.30 కోట్లు. డబ్బు అందుకున్న మహిళలు తమ పిల్లల కోసం వెచ్చిస్తున్నారు.

ఇంకా ఎన్నో..

ఇవే కాదు. ఇంకా ఎన్నో పథకాలకు ఈ ప్రభుత్వం శ్రీకారం చుట్టింది. సచివాలయాలు పెట్టి గ్రామస్వరాజ్యం తెచ్చారు. వాటిల్లో యువతకు ఉద్యోగాలు కల్పించారు. వారు, వలంటీర్లు పథకాలను క్షేత్రస్థాయిలో అర్హులకు పక్కాగా అందిస్తున్నారు. అవినీతి రహితంగా జరుగుతున్న ప్రక్రియ ఇది. ఏదైనా కారణాలతో అర్హులు మిగిలిపోతే వారి కోసం మళ్లీ ప్రత్యేక కార్యక్రమం పెడుతున్నారు. సాంకేతిక సమస్యలు పరిష్కరించి నగదు అందిస్తున్నారు. కోవిడ్‌ మహమ్మారి సమయంలోనూ ఆపలేదు. దేశంలో ఏ ప్రభుత్వం ఇంత పారదర్శకంగా పథకాలను అమలు చేయడం లేదు. తెలుగుదేశం పార్టీకి చెందిన వారికి పథకాలు అందాయి. కులం చూడం.. మతం చూడం.. రాజకీయాలు చేయం.. ప్రతి పథకాన్ని అవసరమైన వారికి చేరుస్తామని ఆనాడు జగన్‌ చెప్పినట్లే ప్రస్తుతం జరుగుతోంది. గడప గడపకూ మన ప్రభుత్వంలో భాగంగా గ్రామాలకు వెళ్లిన వైఎస్సార్‌సీపీ ఎమ్మెల్యేలకు టీడీపీ వర్గీయులు చాలామంది మాకు పథకాలు అందాయని ఆనందంగా చెప్పిన సందర్భాలు ఎన్నో ఉన్నాయి. ఒక్కో కుటుంబం రూ.లక్షల్లో లబ్ధి పొందింది. జగన్‌లా పథకాలు అమలు చేయడం ఎవరికీ సాధ్యం కాదని ప్రజానీకం కొనియాడుతోంది.

– వీకే..