నేటినుండి ఆంధ్రప్రదేశ్ రాష్ట్ర వ్యాప్తంగా కుల గణన కార్యక్రమం ప్రారంభమైంది. బడుగు, బలహీన వర్గాలకు ఆర్థిక, రాజకీయ సాధికారత కల్పిస్తూ ముఖ్యమంత్రి జగన్ కులగణన కార్యక్రమానికి శ్రీకారం చుట్టారు. ఈ నేపథ్యంలో సచివాలయాల ఉద్యోగులు, వలంటీర్లు ఈనెల 28వతేదీ వరకు అనగా పది రోజులు పాటు రాష్ట్రంలోని ప్రతి ఒక్కరికి సంబంధించిన వివరాలను కులాల వారీగా సేకరించనున్నారు.బడుగు బలహీన వర్గాల అభ్యున్నతి కోసం తన జీవితాన్ని అంకితం చేసిన మహనీయుడు అంబేడ్కర్ విగ్రహ ఆవిష్కరణ నాడే రాష్ట్రంలో కులగణనకు శ్రీకారం చుట్టడం గమనార్హం.
ఏపీలో కులగణన చేయనున్న నేపథ్యంలో ముందుగా ఆరు జిల్లాల్లోని 7 సచివాలయాల పరిధిలో కులగణన ప్రక్రియను విజయవంతంగా నిర్వహించారు. శ్రీకాకుళం,అల్లూరి సీతారామరాజు, డాక్టర్ బీఆర్ అంబేడ్కర్ కోనసీమ, ఎన్టీఆర్, శ్రీపొట్టి శ్రీరాములు నెల్లూరు, వైఎస్సార్ కడప జిల్లాల్లోని కొన్ని సచివాలయాల పరిధిలో పైలట్ ప్రాజెక్టుగా 3,323 కుటుంబాలకు సంబంధించి 7,195 మంది వివరాలను నమోదు చేశారు.
గతంలో గ్రామ, వార్డు సచివాలయాల శాఖ, వలంటీర్ల ద్వారా సేకరించిన డేటా ప్రకారం ఆంధ్రప్రదేశ్ లోని గ్రామాల్లో 1,23,40,422 కుటుంబాలకు చెందిన 3,56,62,251 మంది నివాసం ఉంటుండగా, పట్టణ ప్రాంతాల్లో 44,44,887 కుటుంబాలలో 1,33,16,091 మంది నివసిస్తున్నారు. మొత్తంగా రాష్ట్ర వ్యాప్తంగా 1.67 కోట్ల కుటుంబాలలో 4.89 కోట్ల మంది ఉన్నారు. కాగా కులగణన కోసం గ్రామ, వార్డు సచివాలయాల శాఖ ప్రత్యేకంగా ఒక మొబైల్ యాప్ను రూపొందించగా దాదాపు 723 కులాల జాబితాలను ఓసీ, ఎస్సీ, ఎస్టీ, బీసీల వారీగా వర్గీకరించి మొబైల్ యాప్లో అనుసంధానించారు. ఓసీ, బీసీ, ఎస్టీ, ఎస్సీ కేటగిరీలో పేర్కొన్న 723 కులాలకు అదనంగా మరో మూడు కులాలు బేడ జంగం లేదా బుడగ జంగం, పిరమలై కల్లర్ (తేవర్), యలవ కులాల వివరాలను వేరుగా అదర్స్ కేటగిరిలో సేకరించనున్నారు. వీటితో పాటు నో క్యాస్ట్ కేటగిరీని కూడ కులగణన ప్రక్రియలో ఉపయోగించనున్నారు.
కులగణన ప్రక్రియను ఆన్లైన్ విధానంలో పారదర్శకంగా నమోదు చేసేందుకు కుటుంబంలో ఎవరైనా ఒక వ్యక్తి నుంచి ఆధార్తో కూడిన ఈ –కేవైసీ తో పాటు బయోమెట్రిక్, ఐరిస్ తదితర విధానాలకు అవకాశం కల్పించారు. కాగా గిరిజన, మారుమూల ప్రాంతాల్లో సిగ్నళ్లు లేనిచోట్ల ఆఫ్లైన్ విధానంలో సమాచారం సేకరించనున్నారు. ఇప్పటికే రెండుసార్లు వాయిదా పడిన ఈ కార్యక్రమాన్ని ఇదే రోజున ప్రారంభించడం ద్వారా అర్హత కలిగిన ప్రతి ఒక్కరికీ ప్రభుత్వ పథకాలు, సంక్షేమ కార్యక్రమాలు మరింత చేరువ కానున్నాయి.