మంత్రిమండలి సమావేశంలో తీసుకున్న కొన్ని కీలక నిర్ణయాలు

సీఎం జగన్ అధ్యక్షతన జరిగిన కేబినెట్‌ భేటీలో కీలక నిర్ణయాలు తీసుకున్నారు. మొత్తం 45 అంశాలపై చర్చించిన ఏపీ కేబినెట్‌ పలు నిర్ణయాలకు ఆమోదం తెలిపింది.

• వైయస్సార్‌ ఆరోగ్య శ్రీ, జగనన్న ఆరోగ్య సురక్ష కార్యక్రమాలపై కేబినెట్లో విస్తృత చర్చ జరిగింది. ఈ కార్యక్రమాలను సమర్థవంతంగా ముందుకు తీసుకెళ్లడంపై మంత్రులకు సీఎం జగన్ దిశానిర్దేశం చేశారు. అనంతరం వైయస్సార్‌ ఆరోగ్య శ్రీ పరిమితిని రూ.25 లక్షలకు పెంచుతూ కేబినెట్‌ నిర్ణయం తీసుకుంది..ఈనెల 18న నూతన ఫీచర్లతో కొత్త ఆరోగ్యశ్రీ కార్డుల పంపిణీ కార్యక్రమాన్ని సీఎం జగన్ ప్రారంభించనున్నారు. కాగా డిసెంబర్‌ 19న క్షేత్రస్థాయిలో ప్రారంభం కానున్న ఈ కార్యక్రమంలో ప్రతి నియోజకవర్గంలో ఐదు గ్రామాల్లో జరిగే కార్యక్రమాల్లో ఎమ్మెల్యేలు పాల్గొంటారు.
• కడప ప్రభుత్వ వైద్యకళాశాలలో 300 పడకలతో సూపర్‌ స్పెషాలిటీ బ్లాక్‌లో పేదలకు మరింత మెరుగైన, అత్యాధునిక వైద్యాన్ని అందించేందుకు వీలుగా నూతనంగా 293 పోస్టుల భర్తీ చేయాలన్న వైద్య ఆరోగ్యశాఖ అధికారుల ప్రతిపాదనలకు మంత్రిమండలి ఆమోదం తెలిపింది.
• గుంటూరు సర్వజన ప్రభుత్వ ఆసుపత్రిలో 18 హెడ్‌ నర్స్, నర్సింగ్‌ సూపరింటెండ్‌ పోస్టుల భర్తీకి కేబినెట్‌ గ్రీన్ సిగ్నల్ ఇచ్చింది.
• రాష్ట్ర వ్యాప్తంగా ఉన్న 11 పాత వైద్య కళాశాలల్లో నెఫ్రాలజీ, న్యూరాలజీ, న్యూరోసర్జరీ విభాగాల ఏర్పాటును కేబినెట్‌ ఆమోదించింది. మార్కాపురంలో కూడా ఇవే సేవలందించేందుకు సంబంధిత విభాగాల ఏర్పాటుకు కేబినెట్‌ ఆమోదం తెలిపింది. 287 పోస్టుల భర్తీకి కేబినెట్‌గ్రీన్ సిగ్నల్ ఇచ్చింది. తద్వారా ప్రైవేటు ఆస్పత్రులకు ధీటుగా ఈ విభాగాల్లో పేదలకు అందనున్న వైద్య సేవలు అందనున్నాయి.
• విజయనగరం, రాజమహేంద్రవరం, ఏలూరు, మచిలీపట్నం, నంద్యాల కొత్త మెడికల్‌ కాలేజీలలో గైనిక్, పీడియాట్రిక్, అనస్థీసియా విభాగాల్లో 95 పోస్టుల భర్తీ చేయాలన్న ప్రతిపాదనలను మంత్రిమండలి ఆమోదించింది.
• విజయనగరం జిల్లా చీపురుపల్లి కమ్యూనిటీ హెల్త్‌ సెంటర్‌(సీహెచ్‌సీ)ను 50 పడకల నుంచి 100 పడకల ఆసుపత్రిగా అప్‌గ్రేడ్‌ చేస్తూ తీసుకున్న నిర్ణయానికి మంత్రిమండలి ఆమోదముద్ర వేసింది.
• రాష్ట్ర వ్యాప్తంగా ఏడు ప్రభుత్వ ఆసుపత్రుల్లో క్యాన్సర్‌ చికిత్సలో మెరుగైన, అత్యాధునిక చికిత్స అందించేందుకు కొత్తగా కేన్సర్‌ విభాగాలను ఏర్పాటు చేయాలన్న నిర్ణయాన్ని మంత్రిమండలి ఆమోదించింది. ఏడు ప్రభుత్వ జనరల్‌ ఆసుపత్రుల్లో( శ్రీకాకుళం, కాకినాడ, విజయవాడ, ఒంగోలు, నెల్లూరు, తిరుపతి, అనంతపురం) కేన్సర్‌ (ఆంకాలజీ– రేడియేషన్, సర్జికల్, మెడికల్‌ ఆంకాలజీ) విభాగాన్ని 64 పోస్టులతో ఏర్పాటు చేయాలన్న ప్రతిపాదనలను మంత్రిమండలి ఆమోదించింది.
• డిసెంబరు 21 తేదీనుండి 31 వ తేదీ వరకు 8వతరగతి చదువుతున్న ప్రభుత్వ, ఎయిడెడ్‌ పాఠశాలల విద్యార్ధులకు ట్యాబుల పంపిణీ కార్యక్రమం చేపట్టనుంది రాష్ట్ర ప్రభుత్వం. రూ.638 కోట్ల వ్యయంతో 4 లక్షల 35 వేల ట్యాబుల పంపిణీకి జగన్ సర్కారు శ్రీకారం చుట్టింది. 6 వతరగతి ఆపై తరగతి గదుల్లో ప్రతిగదిలోనూ ఒక ఇంటరాక్టివ్ ఫ్లాట్ ప్యానెల్‌( ఐఎఫ్‌పీ) చొప్పున 62వేల తరగతి గదుల్లో ఐఎఫ్‌పీల ఏర్పాటు చేయనున్నారు. గతంతో పోల్చితే మరింత మెరుగైన ట్యాబ్‌ కెఫాసిటీ మెరుగు పరచడంతో పాటు విదేశీ భాషలునేర్చుకునేందుకు వీలుగా డ్యుయో లింగో యాప్‌ను అందుబాటులోకి తెచ్చారు . విద్యార్ధుల సందేహాల నివారణ కోసం ఆర్టిఫీషియల్‌ ఇంటెలిజెన్స్‌ టూల్‌ను కూడా ట్యాబుల్లో ఏర్పాటు చేశారు.
• పాదయాత్రలో చెప్పిన మాట, మేనిఫెస్టోలో ఇచ్చిన హామీని నిలబెట్టుకుంటూ రాష్ట్ర ప్రభుత్వం మరో కీలక నిర్ణయం తీసుకుంది.
  అవ్వా తాతలు, వితంతవులు, ఒంటరి మహిళలు, చేనేత, కళ్లు గీత కార్మికులు, చర్మకారులు, హెచ్‌ఐవీ వ్యాధిగ్రస్తులు, మత్స్యకారులకు అందించే వైఎస్సార్‌ పెన్షన్‌ కానుక పెంచుతూ తీసుకున్న నిర్ణయానికి కేబినెట్‌ ఆమోదం తెలిపింది. దాంతో ప్రస్తుతం అందిస్తున్న రూ.2,750 నుంచి రూ.3000కు సామాజిక పెన్షన్‌ పెరగనుంది. పెంచిన పెన్షన్‌ వలన ప్రభుత్వం నెలకు దాదాపు రూ.2,000 కోట్లు ఖర్చు చేయనుంది . గత ప్రభుత్వంలో నెలకు కేవలం రూ.400 కోట్లు మాత్రమే వెచ్చించడం గమనార్హం. డిసెంబరులో పెంచిన పెన్షన్‌ మొత్తాన్ని జనవరి 1 తేదీ నుంచి జనవరి 8వ తేదీ 2024 వరకు 65,33,781 మంది పెన్షన్‌ దారులకు అందజేయనున్నారు. జనవరి 1 నుంచి జనవరి 8 వరకు 8 రోజుల పాటు పండుగ వాతావరణంలో పెన్షన్‌ పెంపు కార్యక్రమాలు జరగనుండగా ప్రజా ప్రతినిధులు, ఎమ్మెల్యేలు ఈ కార్యక్రమంలో పాల్గొంటారు.
• జనవరి 10 నుంచి జనవరి 23 వరకు ప్రతి ఎమ్మెల్యే నియోజవర్గంలో మండల స్ధాయిలో వైఎస్సార్‌ ఆసరా నాలుగవ విడత విడుదల కార్యక్రమంలో పెద్ద ఎత్తున పండగ వాతావరణంలో స్వయం సహాయక సంఘాల అక్కచెల్లెమ్మలతో నిర్వహించనున్నారు. ఆసరా కింద ఇప్పటికే 78.81 లక్షల మందికి రూ.19,165.28 కోట్లను రాష్ట్ర ప్రభుత్వం పంపిణీ చేయగా చివరి విడత అయిన నాలుగో విడతలో రూ.6,394 కోట్ల పంపిణీ చేయనుంది.
• పేద అక్కచెల్లెమ్మల ఆర్ధిక స్వావలంబన, సాధికారత లక్ష్యాలుగా వారి జీవితాల్లో వెలుగులు నింపడానికి అందిస్తున్న వైఎస్సార్‌ చేయూత కార్యక్రమాన్ని జనవరి 29 నుంచి ఫిబ్రవరి 10 వరకూ పండుగలా నిర్వహించనుంది వైయస్‌ జగన్‌ ప్రభుత్వం. దేశంలో ఎక్కడా, గతంలో ఎన్నడూ లేని విధంగా 45 ఏళ్ల నుండి 60 ఏళ్ల మధ్య వయస్సు గల అక్కచెల్లెమ్మలను ఆదుకుంటూ వారిని చేయిపట్టుకుని నడిపిస్తూ వైయస్సార్‌ చేయూత ద్వారా ఏటా రూ.18,750ల చొప్పున వరుసగా నాలుగేళ్లు అండగా జగన్ ప్రభుత్వం నిలబడింది.
• రాష్ట్ర వ్యాప్తంగా కొత్తగా ఏర్పాటు చేసిన 26 రెవెన్యూ డివిజనల్‌ కేంద్రాల్లో వివిధ సంక్షేమ పథకాలను సమర్ధవంతంగా అమలు చేసేందుకు, డెలివరీ మెకానిజమ్‌ను పటిష్టపరిచే చర్యల్లో భాగంగా 26 డివిజనల్‌ డెవలప్‌మెంట్‌ ఆఫీసర్‌ పోస్టుల భర్తీకి కేబినెట్‌ ఆమోదం తెలిపింది.
• గ్రామంలో ప్రతి ఇంటికి సురక్షిత తాగునీరు అందించడమే లక్ష్యంగా జలజీవన్‌ మిషన్‌ కింద గ్రామ జలసంఘం కమిటీల ఏర్పాటుకు కేబినెట్‌ ఆమోదం తెలిపింది.
• శ్రీకాకుళం జిల్లా ఆముదాలవలసలో గురుకుల పాఠశాల నుంచి అప్‌గ్రేడ్‌ అయిన మహాత్మా జ్యోతిబాపూలే ఆంధ్రప్రదేశ్‌ బీసీ వెల్ఫేర్‌ మహిళా గురుకుల కళాశాలలో రెగ్యులగ్‌ విధానంలో 2, అవుట్‌ సోర్సింగ్‌ విధానంలో 6 పోస్టుల భర్తీకి కేబినెట్‌ గ్రీన్‌ సిగ్నల్‌ ఇచ్చింది.
• గిరిజన సంక్షేమ ఆశ్రమ ఉన్నతపాఠశాలల్లో 251 ( తెలుగు భాషాపండితులు 98, హిందీ భాషా పండితులు 93, పిజికల్‌ ఎడ్యుకేషన్‌ ట్రైనింగ్‌ టీచర్స్‌ 60) పోస్టులను అప్‌గ్రెడేషన్‌ చేస్తూ తీసుకున్న నిర్ణయానికి కేబినెట్‌ ఆమోదం తెలిపింది.
• పిఫ్త్‌ ఫైనాన్స్‌ కమిషన్‌ విధులు సజావుగా నిర్వహించేందుకు వీలుగా అవసరమైన 10 పోస్టులను తాత్కాలిక విధానంలో భర్తీ చేయాలన్న ప్రతిపాదనను మంత్రిమండలి ఆమోదించింది.
• యాంటీ నక్సలైట్‌ ఆపరేషన్స్‌లో విధులు నిర్వహిస్తున్నవారికి అందించే యాంటీ నక్సలైట్‌ స్క్వాడ్‌ అలవెన్స్‌ను బేసిక్‌ పేలో 15 శాతం ఇంక్లూడ్‌ చేయాలన్న ప్రతిపాదనకు కేబినెట్‌ గ్రీన్‌ సిగ్నల్‌ ఇచ్చింది.
• కేంద్ర ప్రభుత్వసర్వీసు ఉద్యోగులతో సమానంగా జ్యుడీషియల్‌ అధికార్లకు డీఏ, జ్యుడీషియల్‌ పెన్షనర్లకు డీఆర్‌ ఇస్తూ విడుదల చేసిన జీవోలను కేబినెట్‌ ఆమోదించింది. 01–01–2023 నుంచి ఈ ఉత్తర్వులు అమల్లోకి రానున్నాయి .
• 50 ఎకరాలలోపు భూములకు సంబంధించిన ఏపీఐఐసీ ద్వారా కేటాయించిన 110 అలాట్‌మెంట్‌లను కేబినెట్‌ ఆమోదించింది. 10–11–2023 నుంచి 06–12–2023 మధ్య జరిగిన కేటాయింపులకు కేబినెట్‌ గ్రీన్‌ సిగ్నల్‌ ఇచ్చింది.
• ఆంధ్రప్రదేశ్‌ మారిటైమ్‌ ఇన్‌ఫ్రాస్ట్రక్చర్‌ కార్పొరేషన్‌ను ఆంధ్రప్రదేశ్‌ మారిటైం బోర్డులో విలీనం చేస్తూ తీసుకున్న నిర్ణయానికి కేబినెట్‌ ఆమోదం తెలిపింది. దీంతో ఫిషింగ్‌ హార్భర్ల నిర్మాణాం ఏపీ మారిటైం బోర్డుపరిధిలోకే రానున్నాయి.
• ప్రజలకు మరింత మెరుగైన సేవలను అందించేందుకు గానూ కొత్తగా ఏర్పాటు అయిన కమలాపురం నగర పంచాయితీలో 7 పోస్టుల భర్తీతో పాటు, కమలాపురం, మీరాపురం గ్రామపంచాయితీలను విలీనంచేసి కమలాపురం నగరపంచాయితీగా ఏర్పాటు చేసిన నేపధ్యంలో ఇప్పటికే ఉనికిలో ఉన్న 14 పోస్టులను తగిన కేడర్‌లో సర్ధుబాటు చేయాలన్న నిర్ణయానికి కేబినెట్‌ ఆమోదం తెలిపింది.
• విశాఖపట్నంలో 4 కారిడార్లలో లైట్‌ మెట్రో రైల్‌ ప్రాజెక్ట్‌ ఏర్పాటుకు సంబంధించి డీపీఆర్‌ను కేబినెట్‌ ఆమోదించింది .
  76.9 కిలోమీటర్ల నిడివితో మెట్రో రైల్‌ ప్రాజెక్ట్‌ ఉండనుంది.
• పశ్చిమగోదావరి జిల్లా తాడేపల్లిగూడెంలో అదనపు జిల్లా జడ్జి మరియు సెషన్స్‌ జడ్జి కోర్టు ఏర్పాటుకు కేబినెట్‌ గ్రీన్ సిగ్నల్ ఇచ్చింది.
• న్యాయశాఖలో 2 డేటా ఎంట్రీ ఆపరేటర్‌ పోస్టుల భర్తీకి కేబినెట్‌ ఆమోదం తెలిపింది.
• తూర్పుగోదావరి జిల్లా దేవరాపల్లిలో ఆర్‌అండ్‌బి యూనిట్‌ కార్యాలయం ఏర్పాటుకు కేబినెట్‌ ఆమోదం తెలిపింది.
• ఆడుదాం ఆంధ్ర కార్యక్రమానికి కేబినెట్‌ ఆమోదం తెలిపింది. కాగా ఐదు ఆటలతో 51రోజులపాటు ఆడుదాం ఆంధ్ర జరగనుంది. ఇందులో భాగంగా క్రికెట్, వాలీబాల్, బ్యాడ్మింటన్, కబాడీ, ఖోఖో ఆటల్లో పోటీలు జరగనున్నాయి. ఇప్పటివరకూ ఆడుదాం ఆంధ్రలో 1.14 కోట్ల రిజిస్ట్రేషన్లు రాగా సుమారు 31 లక్షల మంది క్రీడాకారులు నమోదు చేసుకున్నారు. మండల స్థాయిలో బహుమతిగా క్రీడాపరికరాలను రాష్ట్ర ప్రభుత్వం ఇవ్వనుండగా, నియోజకవర్గ స్థాయిలో విజేతలకు రూ.35వేలు, రూ.15వేలు, రూ.5వేలు,జిల్లా స్థాయిలో రూ.60వేలు, రూ.30వేలు, రూ.10వేలు, రాష్ట్రస్థాయిలో రూ.5 లక్షలు, రూ.3 లక్షలు, రూ.2 లక్షలను ప్రభుత్వం బహుమతిగా ఇవ్వనుంది. బ్యాడ్మింటన్‌ డబుల్స్‌ పోటీలకు మొదటి మూడు స్థానాల్లో నిలిచిన విజేతలకు నియోజకవర్గ స్థాయిలో రూ.20వేలు, రూ.10వేలు, రూ.5వేలు,జిల్లాస్థాయిలో రూ. 35వేలు, రూ.20వేలు, రూ.10వేలు, రాష్ట్ర స్థాయిలో రూ.2 లక్షలు, రూ.1లక్ష, రూ.50వేలను ప్రభుత్వం అందించనుంది .

కాగా ఆడుదాం ఆంధ్ర పోటీలకు దాదాపుగా రూ.120 కోట్లు జగన్ ప్రభుత్వం వెచ్చిస్తుండగా డిసెంబర్‌ 26న ఆడుదాం ఆంధ్ర పోటీలు ప్రారంభం కానున్నాయి. ఆడుదాం ఆంధ్ర బ్రాండ్‌ అంబాసిడర్లుగా అంబటి రాయుడు, కరణం మల్లేశ్వరి, కోన శ్రీకర్‌ భరత్, రావి కల్పన, పీవీ సింధు, కిడాంబి శ్రీకాంత్, వి.జ్యోతి సురేఖ, సాత్విక్, సాకేత్‌ మైనేని, చేతన్‌ ఆనంద్, కోనేరు హంపి, ఇ.రజనిలు వ్యవహరించనున్నారు. ఆడుదాం ఆంధ్రకు కర్టెన్‌ రైజర్‌గా ఎమ్మెల్యేలకు ప్రభుత్వం పోటీలు నిర్వహించనుంది.

• సాధారణ ఎన్నికల విధుల నిర్వహణకు అవసరమైన అదనపు సిబ్బందిని చీఫ్ ఎలక్టోరల్ ఆఫీసర్‌, డిస్ట్రిక్ట్ ఎలక్షన్ ఆఫీసర్‌ మరియు రిటర్నింగ్ ఆఫీసర్‌ కార్యాలాయాల్లో వివిధ కేటగిరీలలో నియామకానికి కేబినెట్‌ గ్రీన్‌ సిగ్నల్‌ ఇచ్చింది. ఇందులో భాగంగా 982 మందిని తాత్కాలిక పద్దతిలో నియమించనుంది ప్రభుత్వం.
• కుల, ఆదాయ ధృవీకరణపత్రాలు మంజూరులో తీసుకొచ్చిన సంస్కరణలకు మంత్రిమండలి ఆమోదముద్రవేసింది. గతంలో కులధృవీకరణపత్రం ఇచ్చినా, తండ్రికి గాని, అన్నదమ్ములకుగాని గతంలో జారీచేసిన ధృవీకరణ పత్రం ఇచ్చినా దాని ఆధారంగా గ్రామ, వార్డు సచివాలయాల్లో వెంటనే కులధృవీకరణ పత్రాలు జారీచేసేలా నిర్ణయానికి కేబినెట్‌ ఆమోదం తెలిపింది.
• ఎన్టీఆర్‌ జిల్లా విజయవాడ రూరల్‌ మండలం రాయనపాడులో 0.20సెంట్ల ప్రభుత్వ భూమిని సీఐడీ ప్రాంతీయ కార్యాలయ నిర్మాణానికి కేటాయించాలన్న ప్రతిపాదనకు మంత్రిమండలి ఆమోదముద్రవేసింది.
• మిచాంగ్‌ తుపాను కారణంగా జరిగన నష్టంపై తుపాను సమయంలో తీసుకున్న చర్యలపైన కేబినెట్‌లో చర్చ జరిగింది. మిచాంగ్‌ తుపానులో చేపట్టిన సహాయక చర్యల వివరాలను కేబినెట్‌కు అధికారులు అందజేసారు.
• అన్నమయ్య జిల్లా చిట్వేలు, కోడూరు, సంబేపల్లె మండలాల్లో జిల్లా హరిజన డెవలప్‌మెంట్‌ కార్పొరేషన్‌ భూములను.. భూమిలేని ఎస్సీ, ఎస్టీ పేదలకు ఇవ్వాలన్న ప్రతిపాదనలకు కేబినెట్‌ గ్రీన్‌ సిగ్నల్‌ ఇచ్చింది.1269 ఎకరాలను, 796 మంది లబ్దిదారులకు డీకేటీ పట్టాల పంపిణీ చేపట్టనుంది .
• స్కిల్‌ డెవలప్‌మెంట్‌ అండ్‌ ట్రైనింగ్‌ డిపార్ట్‌మెంట్‌లకు శాశ్వత భవనాలకు కేబినెట్ గ్రీన్ సిగ్నల్ ఇచ్చింది. విశాఖపట్నం జిల్లా ఆనందపురం మండలం తర్లువాడలో 7 ఎకరాల భూమిని నేషనల్‌ స్కిల్‌ ఇనిస్టిట్యూట్‌ తో పాటు, రీజనల్‌ డైరెక్టరేట్‌ ఆఫ్‌ స్కిల్‌ డెవలప్‌మెంట్‌ అండ్‌ ఎంటర్‌ ప్రెన్యూర్‌షిప్‌ భవనాల కోసం కేటాయించాలన్న ప్రతిపాదనలకు కేబినెట్‌ ఆమోదం తెలిపింది.
• ప్రముఖ జానపద కళాకారుడు స్వర్గీయ వంగపండు ప్రసాదరావు సతీమణి వంగపండు విజయలక్ష్మికి విశాఖపట్నం జిల్లా పెందుర్తి మండలం నరవలో 1000 చదరపు గజాల ఇంటిస్ధలాన్ని గజం రూ.10లకే ఇవ్వాలన్న ప్రతిపాదనలకు కేబినెట్‌ ఆమోదముద్ర వేసింది.
• విశాఖపట్నం జిల్లా మధురవాడ వద్ద 11.25 ఎకరాల భూమిని, ఎకరా కోటి రూపాయల చొప్పు బెంగుళూరుకు చెందిన టీఐఎస్‌బీ ఇంటర్నేషనల్‌ స్కూల్‌కు కేటాయించింది. ఈ స్కూల్లో 25 శాతం సీట్లు విద్యా హక్కు చట్టం కింద, మరో 25శాతం సీట్లు స్థానికులకు ఉచితంగా కేటాయించనున్నారు.
• బీచ్‌ టూరిజం అభివృద్ధిలో భాగంగా ఆంధ్రప్రదేశ్‌ పర్యాటకశాఖకు శ్రీకాకుళం జిల్లా వజ్రపుకొత్తూరు మండలం అక్కుపల్లి వద్ద 5 ఎకరాల భూమిని కేటాయించాలన్న ప్రతిపాదనలకు మంత్రిమండలి ఆమోదం తెలిపింది. పార్వతీపురం మన్యం జిల్లా గరుగుబిల్లి మండలం నాగూరులో మూడు సర్వే నెంబర్లలో సుమారు 10 ఎకరాల భూమిని సైంటిఫిక్‌ డ్రైవింగ్‌ టెస్ట్‌ ట్రాక్‌ అండ్‌ ఫిట్నెస్‌ టెస్టింగ్‌ స్టేషన్‌ ఏర్పాటుకు రహదారులు, భవనాలశాఖకు ఉచితంగా కేటాయించాలన్న ప్రతిపాదనకు మంత్రిమండలి ఆమోదముద్ర వేసింది.
• కర్నూలు జిల్లా ఆదోని మండలం ఎస్‌.కొండాపురం, బైచిగిరి, కాపటి గ్రామాలకుచెందిన సుమారు 10 ఎకరాల భూమిని ఆర్టీఓ కార్యాలయం, డ్రైవింగ్‌ టెస్టింగ్‌ ట్రాక్‌ ఏర్పాటు కోసం రహదారులు, భవనాలశాఖకు కేటాయించాలన్న ప్రతిపాదనలను కేబినెట్‌ ఆమోదించింది .కర్నూలు జిల్లా కల్లూరు మండలం లక్ష్మీపురం, దూపాడు గ్రామాలకు చెందిన 5.68 ఎకరాల భూమిని పర్యాటరంగ అభివృద్ధి కోసం ఆంధ్రప్రదేశ్‌ పర్యాటకశాఖకు కేటాయించాలన్న ప్రతిపాదనలకు కేబినెట్‌ గ్రీన్‌ సిగ్నల్‌ ఇచ్చింది.
• రోడ్డు ప్రమాదంలో ఎమ్మెల్సీ షేక్‌ సాబ్జీ మరణ వార్త తెలుసుకుని దిగ్భ్రాంతి వ్యక్తం చేసిన ముఖ్యమంత్రి, మంత్రివర్గం. రెండు నిమిషాలు మౌనం పాటించి ఎమ్మెల్సీ షేక్‌ సాబ్జీ మృతికి కేబినెట్‌ సంతాపం తెలిపింది.