ఏపీకి బెస్ట్‌ పెవిలియన్‌ అవార్డు

ఆంధ్రప్రదేశ్ మరోసారి సత్తా చాటింది. బెంగుళూరులో మిల్లెట్స్‌ ఆర్గానిక్స్‌పై అంతర్జాతీయ సేంద్రీయ వాణిజ్య ప్రదర్శన జరిగింది. ఈ నెల 5 నుంచి 3 రోజుల పాటు జరిగిన ఈ ప్రదర్శనలో ఆంధ్రప్రదేశ్‌కు బెస్ట్‌ స్టేట్‌ పెవిలియన్‌ అవార్డు వరించింది. ఏపీ రైతు సాధికార సంస్థ ఆధ్వర్యంలోని స్టాల్స్‌కు ఈ అవార్డులు దక్కాయి. గత సంవత్సరం డిసెంబర్‌ 28 నుండి 30 వరకు కేరళలో నిర్వహించిన జాతీయ స్థాయి ఆర్గానిక్‌ ప్రదర్శనల్లో కూడా ఏపీకి రాష్ట్ర స్థాయి ఉత్తమ అవార్డు లభించిన విషయం తెలిసిందే.

కాగా బెంగుళూరులో నిర్బహించిన అంతర్జాతీయ సేంద్రీయ వాణిజ్య ప్రదర్శనలో విదేశీ రైతులతో పాటు దేశ వ్యాప్తంగా 20 రాష్ట్రాల రైతులు పాల్గొని 250 స్టాల్స్ ను ఏర్పాటు చేసి తమ ఉత్పత్తులను ప్రదర్శించారు. స్టాల్‌ వాలిడేషన్‌ కమిటీ పరిశీలనలో ఏపీ రైతు సాధికార సంస్థ ఆధ్వర్యంలోని స్టాల్స్‌, మిగిలిన స్టాల్స్ కన్నా మెరుగ్గా ఉండడంతో బెస్ట్‌ స్టేట్‌ పెవిలియన్, పెస్ట్‌ స్టాల్‌ అవార్డులు వరించాయి. రైతు సాధికార సంస్థ సీనియర్‌ థిమాటిక్‌ లీడ్‌ ప్రభాకర్‌కు కర్ణాటక ఉప ముఖ్యమంత్రి డీకే శివకుమార్, వ్యవసాయ శాఖ మంత్రి చెలువరాయ స్వామి ఈ అవార్డులను ప్రదానం చేశారు.